Ոստիկանություն եմ ներկայացրել Հրանտ Մարգարյանի դեմ հարձակման տեսագրությունները, դրանք կկցվեն գործին. Գեղամ Մանուկյան

«Այսօր ոստիկանության բաժին եմ ներկայացրել շաբաթ օրը Ազատության հրապարակում մի խումբ անձանց կողմից ՀՅԴ Բյուրոյի նախկին ներկայացուցիչ Հրանտ Մարգարյանի եւ նրա ընտանիքի ու թոռների դեմ վայրենի հարձակման բազմաթիվ տեսագրությունները, որոնք կցվելու են քննվող գործին»,- Facebook-ի իր էջում գրել է «Երկիր Մեդիա» հեռուստաընկերության հասարակական-քաղաքական հաղորդումների պատասխանատու, ՀՅԴ անդամ Գեղամ Մանուկյանը:
Նա, մասնավորապես, նշել է. «Ենթադրում եմ, որ առաջիկայում արդեն կհարուցվի քրեական գործ, խմբակային խուլիգանություն հոդվածի հատկանիշներով։ Ի դեպ, ոստիկանները արագ, դեպքից կարճ ժամանակ անց արձագանքել էին ահազանգին եւ արագ քննություն սկսել։ Ոստիկանների արագ արձագանքման եւ պրոֆեսիոնալ քայլերի շնորհիվ էր հնարավոր եղել խուսափել ավելի ծանր բախումից։ Հակառակ դեպքում, եթե նրանք արագ չարձագանքեին, Հրանտ Մարգարյանի որդին՝ Մխիթար Մարգարյանը մի քանիսի մռութը կփշրեր, որի համար ուներ բարոյական եւ իրավական բոլոր իրավունքները, քանզի վտանգված էին իր երկու մանկահասակ զավակները։ Երեխաները սակայն բավականին վախեցել են։ Հ.Գ. առայժմ Հայաստանի իշխանություններրի կողմից որեւէ արձագանք չկա»: