ԱՄՆ-ում ոտքի են կանգնեցրել երեխային, որը ծնվելիս կշռել է ընդամենը 300 գրամ

ԱՄՆ Կենտուկի նահանգում բժիշկները ոտքի են կանգնեցրել երեխային, որը ծնվելիս կշռել է ընդամենը 300 գրամ: Հիմա՝ 9 ամիս անց, նրան վերջապես տուն են ուղարկել: Նրա քաշն այժմ կազմում է 2,7 կգ:

New York Post պարբերականը հայտնում է, որ Քոնոր Ֆլորիոն լույս աշխարհ է եկել 2018 թվականի հուլիսի 13-ին հղիության 27-րդ շաբաթում: Խորը անհասության պատճառով նա դժվար էր շնչում, ուղեղում արյունահոսություն կար, արյան մեջ շաքարի մակարդակի հետ կապված խնդիրներ եւ աչքերի հիվանդություն: Երկու հիվանդանոցի բժիշկները ամբողջ 9 ամիս խնամել են հիվանդ երեխային:

«Ես չէի կարողանում հավատալ, որ նրան դուրս են գրել: Ես դա գիտակցեցի միայն այն ժամանակ, երբ նրան դրեցինք մեքենայի մեջ եւ մինչեւ տուն հասցրեցինք»,- ասել է նրա մայրը՝ Ջեյմի Ֆլորիոն:

Նրա խոսքով՝ տղային դուր է եկել խաղալիքներով խաղալ, իրեն հայելու մեջ նայել եւ լոգանք ընդունել:

Բուժող բժշկի եզրակացությամբ՝ Քոնորի առողջությունը գործնականում վերականգնվել է, եւ տղան շուտով թթվածնային դիմակի կարիք չի ունենա:

«Քոնորն անչափ առույգ եւ ժպտուն է: Ակնհայտ է, որ նա ակտիվորեն զարգանում է»,- հավելել է բժիշկը: